Ürəyində güllə daşıyan qazi İsmayıllıda coşqu ilə qarşılandı
İsmayıllıda Vətən Müharibəsi qazisi coşqu ilə qarşılanıb.
APA TV-nin yerli bürosunun xəbərinə görə, İsmayıllı rayon Kürdmaşı kənd sakini, 1999-cu il təvəllüdlü Asif Yusif oğlu İsmayılov 6 ay öncə hərbi xidmətini başa vurub.
Oktyabrın 5-də könüllü olaraq döyüşlərə yollanan Asif Fizuli, Cəbrayıl, Xocavənd və Şuşa döyüşlərində iştirak edib. Döyüş müddətində fərqləndiyinə görə komandiri tərəfindən ailəsinə təşəkkür məktubu göndərilib.
Asif İsmayılov Şuşa döyüşlərində ağır yaralanıb. Mənfur düşmənin gülləsi onun sağ qabırğasını sındıraraq, ağciyərinin üst pərdəsini zədələyib və ürəyin 5 millimetrlik məsafəsində ilişərək qalıb.
Bu gün Asif doğum günü münasibətilə hərbi hospitaldan evə buraxılıb. Rayon sakinləri Asifi alqışlarla qarşılayıblar. Qazi əvvəlcə İsmayıllı rayon Şənidlər Xiyabanında uyuyan Vətən övladlarının məzarlarını, daha sonra onunla bir yerdə döyüşərək şəhid olan həmkəndlisi Emin Ağazadənin qəbrini ziyarət edib.
Kənd sakinləri onu alqışlarla qarşılayıb, şüarlar səsləndiriblər. Asif İsmayılovun gəlişi münasibətilə yaşadığı evin həyətində qurbanlar kəsilib. Qazimiz bir müddət evdə qaldıqdan sonra müalicəsini davam etdirmək üçün yenidən hərbi hospitala dönəcək.
Şahnəzər Bəşirov
Apa.tv
OXŞAR XƏBƏRLƏR
"Birinci Türkoloji Qurultayın 100 illik yubileyi xalqlarımız üçün tarixi əhəmiyyət daşıyır"
Birinci Türkoloji Qurultayın 100 illiyinə həsr olunmuş “Türk Dünyası Həftəsi”nin açılışı olub
Türk Dünyası Həftəsi ərzində Xankəndidə xüsusi konfrans keçiriləcək
Bakıda Silahlı Qüvvələr Günündə hərbçilərin yürüşü keçirilib – “Ordumuz daim var olsun!”
Azərbaycan ordusu necə dünyanın ən güclü ordularından birinə çevrildi?
