Zaqatalada 36 yaşlı çoban dörd gündür itkin düşüb
Zaqatala rayonunda yüksək dağlıq ərazidə yerləşən yaylaqda çoban itkin düşüb.
APA TV-nin məlumatına görə, Böyük Qafqaz sıra dağlarının Zaqatala rayonu ərazisindən keçən hissəsində çobanlıq edən Muxax kənd sakini, 1982-ci il təvəllüdlü Qurban İbrahim oğlu İbrahimov iyul ayının 21-dən itkin düşüb.
Qurbanın qardaşı Eyvaz İbrahimov APA TV-yə bildirib ki, Dabat adlanan dağda Muxax kənd sakini, fermer Zeynullah Əhmədovun sürüsünü otaran qardaşı başqa bir çobanla qoyun sürüsünün yanında olarkən yemək gətirmək məqsədilə binəyə gedib və geri qayıtmayıb. Digər çoban səhəri gün onun gəlmədiyini gördükdə, özü sürü ilə birlikdə binəyə enib və məlum olub ki, Qurban İbrahimov itkin düşüb. Ehtimal edilir ki, binədən yemək götürüb qayıdan zaman ərazidə qatı duman olduğundan, Qurban dumanda yolunu azaraq itkin düşüb.
Artıq dörd gündür ki, Qurban İbrahimovdan heç bir xəbər yoxdur. Dağlara bələd olan bir neçə çoban onu axtarsa da, bu axtarışlar hələ ki heç bir nəticə verməyib. Eyvaz İbrahimov və fermer Zeynullah Əhmədov rəsmi şəkildə Zaqatala rayon Polis Şöbəsinə və Fövqəladə Hallar Nazirliyinin “qaynar xətt”inə müraciət ediblər.
Fövqəladə Hallar Nazirliyinin (FHN) yaydığı məlumata görə, Qurban İbrahimovun axtarışlarına nazirliyin Xüsusi Riskli Xilasetmə Xidmətinin dağ-xilasedici dəstəsi və xüsusi təlim keçmiş itləri, eləcə də aviasiya dəstəsinin "Mi-17" helikopteri cəlb olunub.
Apa.tv
OXŞAR XƏBƏRLƏR
Prezident: Paytaxtı Şərqi Qüds olan Fələstin dövlətini dəstəkləyirik
Hikmət Hacıyev ölkəmizə qarşı aparılan media kampaniyalarından danışdı
Azərbaycan və Slovakiya prezidentləri Ağdamın Baş Qərvənd kəndində olub
Elektron siqaret, sığorta, qumar: Milli Məclisdən yeni qanun layihələri
Şuşada IV Qlobal Media Forumu öz işinə başladı
