Göyçayda qəzalı məktəbin məzunu 700 bal toplayıb
Bu il Göyçay rayonunun orta ümumtəhsil məktəblərini bitirən məzunlar ali məktəblərə keçirilən qəbul imtahanlarında yüksək nəticə əldə ediblər.
APA TV-nin yerli bürosunun xəbərinə görə, rayonda ən yüksək nəticəni isə Ləkçiplaq kənd 1 saylı tam orta məktəbin məzunları qazanıb.
Məktəbin builki 60 məzunundan 26 nəfəri imtahanlarda uğurla iştirak edərək tələbə adını qazanıb. Məktəbin məzunu Qədirli Şəkər Nail qızı isə Göyçay təhsilinin tarixində bir ilkə imza atıb. O, ali məktəblərə keçirilən qəbul imtahanlarında 700 bal toplayıb: "İmtahan yaxşı oldu. Özümə inanırdım. Bilirdim ki, bacaracağam, bacarmalıyam. Qarşıma məqsəd qoydum ki, mütləq yığmalıyam bu balı. Göyçayda 700 yox idi. İstedadlılarımız çox olub, amma nədənsə 700 olmayıb".
Bakı Ali Neft Məktəbini seçən Şəkər Qədirli heç də yaraşıqlı binası və işıqlı sinif otaqları olan müasir şəhər məktəbinin məzunu deyil. O, 11 il ərzində gördüyümüz bu köhnə, təhsil üçün tam yararsız vəziyyətdə olan bərbad bir kənd məktəbində oxuyub. Heç kim inana bilmir ki, qaranlıq sinif otaqları, qəzalı divarları, tavanı və döşəməsi olan belə bir məktəbdə savadlı, istedadlı şagirdlər yetişər. Bu məktəbdə şagirdlərə və müəllimlərə yaxşı şərait yaradılmasa da, kollektiv bütün çətinliklərə dözərək hər il uğurlar qazanmaqda davam edir. Ötən il bu məktəbin 17 məzunu ali məktəbə daxil olub. Savadlı müəllimlərin gərgin əməyi və şagirdlərin dərsə məsuliyyətli yanaşması nəticəsində dağılmış məktəb bu il daha yüksək uğur qazanıb.
Bu uğurlara baxmayaraq, hazırda Ləkçiplaq kənd 1 saylı məktəbində təhsil alan 600-dən çox şagird böyük çətinliklə üzləşib. Belə bir böyük uğurun sahibi olan məktəb binası tam qəzalı vəziyyətdə olduğu üçün bağlanıb. Bu məktəbdə şagirdlərə təhlükə yarandığı üçün yeni dərs ilində orada dərs keçirilməyəcək. 30 il öncə inşa edilən məktəb binası uçmaq təhlükəsi ilə üzləşdiyi üçün orada əsaslı təmir-bərpa və yenidənqurma işlərinin aparılması nəzərdə tutulur. Lakin bu günədək bu binada hələ təmir işlərinə başlanılmayıb. Müəllim və şagirdlər isə yenidənqurma işlərinin ləngiməsindən çox narahatdır. Təmir-bərpa işləri dövründə dərslərin kənd bələdiyyəsinin köhnə binasında ikinövbəli şəraitdə keçirilməsi nəzərdə tutulur. Kənd sakinləri isə 600-dən çox şagirdin həmin köhnə binaya yerləşdirilməsinin mümkün olmadığını bildirirlər.
Qeyd edək ki, son 4 ildə Ləkçiplaq kənd 1 saylı tam orta məktəbinin 4 məzunu qəbul imtahanlarında yüksək bal toplayaraq Prezident təqaüdünə layiq görülüb.
Apa.tv
OXŞAR XƏBƏRLƏR
XİN-dən hücuma uğrayan gəmidəki azərbaycanlılarla bağlı AÇIQLAMA
Azərbaycan və Rusiya xarici işlər nazirlərinin görüşü olacaq
Prezident: Paytaxtı Şərqi Qüds olan Fələstin dövlətini dəstəkləyirik
Hikmət Hacıyev ölkəmizə qarşı aparılan media kampaniyalarından danışdı
Azərbaycan və Slovakiya prezidentləri Ağdamın Baş Qərvənd kəndində olub
