Yaz bazarlığı neçəyə başa gəlir? - REPORTAJ
Hər mövsümün özünə uyğun meyvə, tərəvəzi var. Qışda yetişən meyvəni yayda, yayda yetişən meyvəni isə qışda yemək mütəxəssislər tərəfindən də məsləhət görülmür.
Yayda bol vitaminli, zəngin tərkibli meyvə-tərəvəz məhsulları orqanizmi lazımi maddələrlə təmin etməyə imkan verir. Məhz bunu nəzərə alaraq hazırda bazarlarda rast gəlinən mövsümi meyvələrin qiymətləri ilə maraqlandıq.
Satıcı hazırda ən çox tələbat olan meyvələrdən danışdı: "İndi əsas göycədir, alçadır, gilas, malina, çiyələkdir. Göycə 4-5 manata, gilaslar 7-8 manata, malina 7-8 manatdır. Çiyələk 1.50-2 manatdır. Tutun qiyməti 6 manatdır. Təzə çıxıb deyə. Ərik kq-ı 4 manatdır. Xarici mal olanda qiymətlər baha olur. Hazırda bizdə xarici mal yoxdur, hamısı yerlidir. Buna görə də qiymətlər münasibdir".
Bazarda təzə üzüm yarpağı da var ki, qiyməti 5-8 manat arasında dəyişir: "Bu Bakıdan da gəlir, rayonlardan da, ağ şanı da olur, onun yarpağı da olur. Keyfiyyətinə görə qiymətlər dəyişir. Eləsi var yarpağın arxası tüklü olur, o ucuzdur, amma təmiz olan yarpaqların qiymətləri bir az baha olur".
Qulança, məröz, mərəçöp - satıcı deyir ki, bu bitki hər bölgədə bir cür adlandırılır, orqanizm üçün isə çox faydalıdır: "Bunun çox böyük faydaları var. Astmaya, şəkərə, yüksək təzyiqə qarşı. Lobyanı neçə bişirirsinizsə, yumurta da vurulur, qızardıb yemək olar. Dəmləyib suyunu da içmək olar. Qiyməti 1-2 manat arasında dəyişir".
Yaz mövsümü ilə əlaqədar bazarlarda qızılgüllərə də rast gəlinir ki, qiymətləri 3 manatdan başlayır. Satıcılar deyir ki, gül ürəyin və bir çox xəstəliklərin dərmanıdır.
Tərəvəzlərin qiymətlərinə gəldikdə, badımcan Bakı badımcanıdır: "5 manata alırıq, 6 manata satırıq. Lobyadır, 3.50 alırıq 4 manata satırıq. Hələ ki, təzə gəlir, bahadır. Pomidorların qiyməti düşüb. 3 manat olub. Əvvəl 5-6 manat idi. Paxla 1.50 qəpikdir. "Kabaçok" da bizim deyil, xaricindir. 3-4 manat arasında dəyişir qiymətləri".
Müştərilərin bəziləri qiymətlərdən razı, bəziləri isə narazıdır:
- Mövsümi meyvələr deyəndə, birinci təmiz meyvə yoxdur. Yəni hamısına kimyəvi maddələr qatırlar. Qiymətləri də şişirdilmiş qiymətlərdir. Bircə çiyələkdən başqa.
- Normal qiymətlərdir hamısı. Münasibdir qiymətlər. Başqa yeri deyə bilmərəm, bazarda yaxşıdır.
Əliniz cibinizdə olsun!
Almaz Qasımova
OXŞAR XƏBƏRLƏR
Azərbaycan və Almaniya prezidentlərinin təkbətək görüşü keçirildi
İlham Əliyev Omanın yeni səfirinin etimadnaməsini qəbul etdi
Prezident Kambocanın yeni səfirinin etimadnaməsini qəbul etdi
İlham Əliyev Braziliyanın yeni səfirinin etimadnaməsini qəbul etdi
XİN-dən hücuma uğrayan gəmidəki azərbaycanlılarla bağlı AÇIQLAMA
