ABŞ Pakistana edəcəyi 900 milyon dollarlıq yardımı dondurduğunu elan edib.

APA TV-nin Türkiyə mətbuatına istinadən məlumatına görə, bu barədə Pentaqonun sözçüsü polkovnik Rob Manninq açıqlama verib.

"Koalisiyaya Dəstək Fondundan Pakistana 900 milyon dollar ayrılması planlaşdırılırdı. Məbləğin ödənilməsi təxirə salınıb. Pakistanın təqib etdiyimiz terrorçulara və terror qruplaşmalarına qarşı ciddi addımlar atacağına ümid etdiyimizdən bu pullar ləğv olunmayıb".

Hərbçi bildirib ki, 2016-cı il büdcəsindən 540 milyon dollar mart ayında Pakistana verilib, 2017-ci il büdcəsindən ayrılacaq yardımların edilməsinə isə oktyabr ayına qədər baxılacaq.

ABŞ Pakistandan "Taliban" və "Hakani" qruplaşmalarının liderlərinin və hücum planı hazırlayanların ölkədə qalmamasını tələb edir.

Manninq məsələnin müzakirə olunacağını, nəticə olmasa gələcək iki il ərzində ayrılacaq yardımların da təxirə salınacağını deyib.

Xatırladaq ki, 4 gün əvvəl ABŞ Pakistana 255 milyon dollar dəyərində təhlükəsizlik məsələləri ilə bağlı maliyyə yardımını dayandırıb.