ABŞ-ın ehtiyatlarının azalması nefti bahalaşdırır
Birjalarda neftin qiyməti 55-56 dollar arasında sabitləşir. APA TV-nin məlumatına görə, səhər seanslarında “Brent” markalı neftin bir bareli 55,83 dollardan satılıb. Qərbi Texas nefti isə 49,95 dollara təklif olunur. İki marka arasında qiymət fərqinin 6 dollara yaxın olması ABŞ-ın bazarda qiymətlərin müəyyənləşməsində təsir imkanlarını hələ bərpa etmədiyini göstərir.
ABŞ Energetika Nazirliyinin ölkənin kommersiya neft ehtiyatlarının həcminə dair son hesabatı qiymətlərin bahalaşmasını dəstəkləyib. Hesabata əsasən, ötən həftə ABŞ-ın neft ehtiyatlarının həcmi 1,3%, yaxud 6 milyon barel azalıb. Hazırda ölkədə 465 milyon barel kommersiya neft ehtiyatı var. Benzin ehtiyatlarının həcmi isə həftə ərzində 1,64 milyon barel artaraq 219 milyon barelə çatıb. Bu, ölkənin neft emalı müəssisələrinin tam gücü ilə işləməyə başladığından xəbər verir.
Hazırda neftin qiyməti iqtisadi deyil, daha çox siyasi amillərin təsiri ilə müəyyən olunur. Rusiya prezidenti Vladimir Putinin Bərzani bölgəsindən neft daşımalarının dayandırılmasına qarşı çıxması qiymətlərə ciddi təsir göstərə bilər. Bu açıqlamadan sonra Türkiyənin Şimali İraqdan neft daşımalarını dayandırması ehtimalı azalıb. Səudiyyə Ərəbistanı kralının Moskvadakı görüşlərində veriləcək bəyanatlar, xüsusilə qlobal neft paktının gələcəyinə dair açıqlamalar neftin qiymətinə pozitiv təsir göstərə bilər.
Elvin Bayramlı
OXŞAR XƏBƏRLƏR
“Bu gün 50 milyondan çox insan üçün Azərbaycan dili ana dilidir” I APA TV
Lüğətimizdə yeni mərhələ: süni intellektdən istifadə olunur I APA TV
Qırğızıstanda “Baku Resort & Spa” mehmanxanasının açılışı oldu | APA TV
İlham Əliyevə 1-ci dərəcəli “Manas” ordeni təqdim edildi
İlham Əliyevin Çolpon-Ata şəhərində rəsmi qarşılanma mərasimi olub
