Zaqatala Gömrük Laboratoriyası istifadəyə verildi
Dövlət Gömrük Komitəsi (DGK) Zaqatalada Mərkəzi Gömrük Ekspertizası İdarəsinin Zaqatala Gömrük Laboratoriyasını istifadəyə verib.
APA TV-nin Şəki-Zaqatala bürosunun məlumatına görə, Azərbaycan Respublikasının fındıq və fındıq məhsullarının ixrac potensialının artırılması, biznes mühitinin yaxşılaşdırılması, iş adamlarının işinin yüngülləşdirilməsi məqsədləri ilə DGK tərəfindən Zaqatala şəhərində Mərkəzi Gömrük Ekspertizası İdarəsinin Zaqatala Gömrük Laboratoriyasını istifadəyə verib.
Laboratoriya müasir standartlara cavab verən avadanlıqla, reaktiv və ləvazimatlarla təchiz edilib. İmmun-Ferment Analizator vasitəsilə aflatoksinlərin təyini üçün sınaqlar aparılacaq.
Aflatoksinlərin təyini üçün istifadə ediləcək metod beynəlxalq səviyyədə tanınmış və qəbul edilmiş metoddur, bu metodla aparılmış sınaqların nəticəsi arbitraj qüvvəyə malikdir. Analiz müddəti qısadır, bu da vaxt itkisini azaldacaq. Laboratoriya tərəfindən beynəlxalq səviyyədə qəbul olunmuş formatda sınaq protokolları veriləcək. Laboratoriyanın mütəxəssisləri Mərkəzi Gömrük Ekspertizası İdarəsinin ekspertləri tərəfindən təlim alıb. Mərkəzi Gömrük Ekspertizası İdarəsi aflatoksinlərin analizi üzrə İSO 17025 Beynəlxalq Standartı ilə akkreditasiya olunub, dəfələrlə beynəlxalq müqayisəli peşəkarlıq testlərində müvəffəqiyyətlə iştirak edib.
Aflatoksinlər-mikotoksin qrupuna aid olan ölümcül təhlükəli üzvi birləşmələridir. Bu maddələr insan orqanizmində onkoloji xəstəliklərə səbəb olur, xüsusən də qara ciyərin xərçəngi ilə nəticələnə bilər. Avropa İttifaqı MDB ölkələrində və Azərbaycanda qida məhsullarında aflatoksinin miqdarının müəyyən normalardan yüksək olmamasına xüsusi nəzarət edir. Tərkibində aflatoksin olan qoz-fındıq məhsullarının ixracına icazə verilmir. Yüksək keyfiyyətli fındıq məhsullarının ixracının artırılması üçün Azərbaycanda yetişdirilən bu məhsulların dəqiq laborator analizi aparılmalıdır.
Vüqar Heydərov
OXŞAR XƏBƏRLƏR
Elçin Əfəndiyevin I Fəxri xiyabanda qəbirüstü abidəsinin açılışı olub
“Bu gün 50 milyondan çox insan üçün Azərbaycan dili ana dilidir” I APA TV
Lüğətimizdə yeni mərhələ: süni intellektdən istifadə olunur I APA TV
Qırğızıstanda “Baku Resort & Spa” mehmanxanasının açılışı oldu | APA TV
İlham Əliyevə 1-ci dərəcəli “Manas” ordeni təqdim edildi
