Dilqəmlə Şahbazın müayinəsi üçün beynəlxalq həkimlər dəvət ediləcək
“Dağlıq-Qarabağ münaqişəsi nəticəsində Dövlət Komissiyasının qeydiyyatında olan itkin düşmüş azərbaycanlıların sayı 3868 nəfərdir”.
APA TV-nin xəbərinə görə, bunu Əsir və itkin düşmüş, girov götürülmüş vətəndaşlarla əlaqədar Dövlət Komissiyasının işçi qrupunun rəhbərinin müavini Eldar Səmədov deyib.
“Dağlıq Qarabağda girovluqda saxlanılan azərbaycanlıların azad olunması istiqamətində Dövlət Komissiyası sədrinin göstərişi ilə fəaliyyətimizi davam etdiririk. Bizdə olan məlumata görə, erməni girovluğundakı azərbaycanlıların səhhətində müəyyən problemlər var. Bu məsələ Dövlət Komissiyasının əməkdaşlıq etdiyi beynəlxalq təşkilatla ətraflı müzakirə olunub. Həmin beynəlxalq təşkilat da girovluqda saxlanılan azərbaycanlıların səhhəti ilə bağlı məsələnin araşdırılacağı, hətta beynəlxalq həkimlərin dəvət edilərək onların səhhətlərinin monitorinq ediləcəyi barədə məlumat verib” deyə o qeyd edib.
Qeyd edək ki, 2014-cü ilin iyul ayında Rusiya vətəndaşı Dilqəm Əsgərov və Azərbaycan vətəndaşı Şahbaz Quliyev Kəlbəcərdə öz ata-baba yurdlarını ziyarət etmək istəyərkən Ermənistan əsgərləri tərəfindən girov götürülüblər, Azərbaycan vətəndaşı Həsən Həsənov isə güllələnərək öldürülüb. H.Həsənovun meyiti düşməndən alınaraq Bakıda dəfn edilib. İşğal altındakı Dağlıq Qarabağda D.Əsgərov və Ş.Quliyev üzərində qanunsuz “məhkəmə” qurulub. “Məhkəmə”nin qərarı ilə D.Əsgərov ömürlük, Ş.Quliyev isə 22 il müddətinə azadlıqdan məhrum edilib.
Bundan əlavə, Azərbaycan vətəndaşı Elnur Hüseynzadə naməlum şəraitdə ermənilərin əlinə düşüb.
Sevinc Vaqifqızı
OXŞAR XƏBƏRLƏR
Rusiyadan Ermənistana Azərbaycan üzərindən YÜK GÖNDƏRİLDİ
10 yeni stansiya tikiləcək – RƏSMİ AÇIQLAMA
Prezidentdən sosial şəbəkələrlə bağlı mühüm fərman
Pakistan səfirliyində Kəşmir İstismar Günü ilə bağlı tədbir keçirildi
Avqustun 15-dən metro sərnişinlərini nə gözləyir? - 11 aylıq tikinti başlayır
