Bakıda TürkPA-nın Ətraf Mühit və Təbii Ehtiyatlar Komissiyasının iclası keçirildi
Bakıda Türkdilli Ölkələrin Parlament Assambleyası (TürkPA) Ətraf Mühit və Təbii Ehtiyatlar Komissiyasının ikinci iclası keçirilib.
APA TV-nin xəbərinə görə, Milli Məclisin Səhiyyə komitəsinin sədri, Azərbaycanın TürkPA-dakı nümayəndə heyətinin üzvü Əhliman Əmiraslanov deyib ki, ətraf mühitin problemlərinə cəmiyyət həssas olmalıdır.
Onun sözlərinə görə, cəmiyyət ətraf mühitlə bağlı problemlərlə məşğul olmazsa, gələcəkdə çox ciddi təhlükələr yarana bilər: “Əsas problemlərdən biri iqlim dəyişikliyi və Günəşin ozon qatının deşilməsidir. Ətraf mühitə insanların atdığı tullantılar ciddi təhlükə yaradır. Hazırda dünyada içməli su problem də var. 1.5 milyard insan çirkli sudan istifadə edir. Bundan başqa, torpaqların eroziyaya uğraması nəticəsində də məhsuldarlıq azalır, meşə sahələri qırılır, bunun cüzi hissəsi bərpa edilir. Son yüz ildə dünyada əhalinin dörd dəfə artması, sənaye müəssisələrinin çoxalması bu cür problemlər yaradır”.
TürkPA Ətraf Mühit və Təbii Ehtiyatlar Komissiyanın sədr müavini, Türkiyənin TürkPA-dakı nümayəndə heyətinin üzvü Feyzullah Kıyıklık deyib ki, iqlim dəyişikliyi təmsil etdiyi ölkəyə də təsirsiz ötüşmür. O bildirib ki, TürkPA-ya üzv olan ölkələr birləşərək belə problemlərlə birgə mübarizə aparmalıdırlar: “Ətraf mühitin problemlərinə həsr olunan 63 səhifəlik sənəd hazırlanıb, bu sənəddə iqlim dəyişikliyi ilə bağlı məsələyə toxunulub".
İclasda çıxış edən Azərbaycanın ekologiya və təbii sərvətlər nazirinin müavini Firdovsi Əliyev xatırladıb ki, bu günə qədər ölkədə ekologiya və ətraf mühitin mühafizəsi ilə bağlı 45 qanun qəbul olunub: “Əgər müstəqilliyin ilk illərində Azərbaycanda xüsusi mühafizə olunan ərazilər 4.5 faiz idisə, bu gün həmin rəqəm 10.5 faizə çatıb. 2000-ci ildə ölkədə 1 milli park var idi. Hazırda isə ölkəmizdə 9 milli park var. Ölkədə 10.3 faiz xüsusi mühafizə olunan ərazi var. Bu gün Avropada vəhşi təbiət qalmayıb. Əgər vəhşi təbiət görmək istəyirsinizsə, buyurun, Azərbaycana gəlin”.
Bildirilib ki, TürkPA Ətraf Mühit və Təbii Ehtiyatlar Komissiyasının növbəti iclası 2017-ci ilin ikinci yarısında Qazaxıstanda keçiriləcək.
İclas müzakirələrlə davam edib.
Sevinc Vaqifqızı
OXŞAR XƏBƏRLƏR
Prezident bu ölkələrə yeni səfirlər təyin etdi
Balakəndə dəhşət saçan qəzanın TƏFƏRRÜATLARI
Əhalinin gəlirləri artıb – Statistika Komitəsi MƏLUMAT YAYDI
Rusiyadan Ermənistana Azərbaycandan keçməklə növbəti tədarük həyata keçirildi
Azərbaycan və Ermənistan lideləri TRIPP marşrutunun icrasını müzakirə ediblər
