SOCAR: 175 təqaüdçü gənc ixtisaslarına uyğun işlə təmin olunub
Bu gün SOCAR-ın baş ofisində Daxili Təqaüd Proqramının qaliblərinə plastik kartların və “Yay məktəbi-2016” iştirakçılarına sertifikatların verilməsi ilə bağlı tədbir keçirilib.
APA TV-nin xəbərinə görə, tədbirdə SOCAR-ın prezidenti Rövnəq Abdullayev, ali məktəb rektorları, qeyri-hökumət təşkilatlarının nümayəndələri iştirak edib.
Rövnəq Abdullayev bildirib ki, SOCAR-ın layihələri artıq Azərbaycanın yox, Avropanın 7-8 şəhərində keçirilir: “Bu layihələrdə SOCAR nəinki iştirakçı kimi iştirak edir, hətta operatorluq edir. Bu işlərin görülməsində ən vacib amil kadr məsələsidir. 2006-cı ildə bu işlərin görülməsinə başladıqda kadr çatışmazlığı, dil biliklərinin olmaması kimi hallarla qarşılaşdıq. Artıq Azərbaycanda nəinki gənc mütəxəssislər, hətta fəhlə kadrları da hazırlanıb”.
SOCAR-ın İnsan Resursları Departamentinin rəisi Asif Bəkirli bildirib ki, kadr potensialının daha da gücləndirilməsi məqsədilə Azərbaycanda neft-qaz ixtisasları üzrə təhsil alan tələbələr üçün reallaşdırılan Daxili Təqaüd Proqramı çərçivəsində indiyədək 175 təqaüdçü “Gənc mütəxəssis” statusu ilə SOCAR-ın strukturlarında ixtisaslarına uyğun işlə təmin olunub. Onun sözlərinə görə, 2015-2016-cı tədris ili üzrə keçirilmiş müsabiqəyə 2026 əlaçı tələbə müraciət edib, onlardan 1571 nəfəri test imtahanında iştirak etmək hüququ qazanıb.
Milli Elmlər Akademiyasının Neft-Kimya Prosesləri İnstitutunun direktoru, akademik Vaqif Abbasov isə deyib ki, bu gün ölkənin neft sənayesində ən böyük problem təhsil müəssisələrində kimya fənninin tədrisi ilə bağlıdır. O bildirib ki, bir çox məktəblərdə kimya fənninin tədrisindən imtina edilir. Onun sözlərinə görə, bu problemlərin həlli üçün kimya müəllimlərinin hazırlanması qaydaları (metodologiyası) dəyişməlidir: “10-cu sinfin 138 səhifəlik “Kimya” kitabını müəllimlər öyrədə bilmirsə, onun əsas səbəbi müəllim hazırlığı ilə bağlıdır. Ona görə müəllimlərin hazırlanması qaydaları dəyişməlidir”.
Apa.tv
OXŞAR XƏBƏRLƏR
“Toxumçuluq haqqında” yeni qanun qüvvəyə minib
Dövlət başçısı: Azərbaycan sülh üçün səylərini bundan sonra da davam etdirəcək
APA Çinin nüfuzlu CCTV+ agentliyi ilə əməkdaşlıq sazişi imzaladı
Muxtar respublikanın iqtisadi potensialı hərəkətə gətirilir
Növbəti günlərdə bizi necə hava gözləyir?
