Bərdədəki Şortəpə abidəsində yeni maddi-mədəniyyət nümunələri tapıldı
Bərdə rayon mərkəzindən 5 kilometr aralıda yerləşən Şortəpə abidəsində arxeoloji tapıntılar üzə çıxıb.
APA TV-nin Qarabağ bürosunun xəbərinə görə, Bərdə arxeoloji ekspedisiyası tərəfindən aparılan qazıntılar zamanı bizim eradan əvvəl VII əsrə aid olduğu ehtimal edilən müxtəlif növ əşyalar aşkarlanıb.
AMEA-nın Arxeologiya və Etnoqrafiya İnstitutunun Bərdə ekspedisiyasının rəhbəri, professor Arif Məmmədovun sözlərinə görə, arxeoloji tədqiqatlar nəticəsində 4 metr enində qala divarları, b.e.ə. VII əsrlərə aid olan maddi-mədəniyyət nümunələri müəyyən edilib.
Arxeoloq bildirib ki, bir neçə il bundan əvvəl Şortəpə abidəsində aparılan tədqiqatlara əsasən belə nəticəyə gəlinib ki, b.e.ə. I minilliyin ortalarında Bərdə artıq yüksək inkişaf etmiş yaşayış yeri olub. O qeyd edib ki, sənətkarlığın əkinçilik və maldarlıqdan ayrılması nəticəsində Bərdə şəhəri meydana gəlib: "Bu prosesin b.e.ə. II minilliyin ortalarında baş verdiyini nəzərə alsaq, şəhərin yaşının 3000 ildən az olmadığı bir daha təsdiqlənir. Qazıntılar zamanı şəhərin tarixini 3 təbəqədə izləmək mümkün olur. Üst təbəqə IX-X əsrləri, 2-ci mədəni təbəqə II əsrdən VIII əsrədək, 3-cü təbəqə bizim eradan əvvəl VII əsrdən bizim eranın III yüzilliyinə qədər olan dövrü əhatə edir".
Apa.tv
OXŞAR XƏBƏRLƏR
Prezident İlham Əliyev və birinci xanım Mehriban Əliyeva paytaxt Daşkənddən Buxaraya gəliblər
Kriptovalyuta müsadirə edildi, təqsirləndirilənlər 35 mln. manatdan çox cərimələndi
Azərbaycan-Özbəkistan müttəfiqlik münasibətləri: Xəzərdə YENİ KOORDİNASİYALI REGİONAL MƏKAN yaranır
Daşkənddə Prezident İlham Əliyevin rəsmi qarşılanma mərasimi olub
Azərbaycan neftinin qiyməti 97 dolları ötüb
