Fransa futbolunda böyük əməliyyat: 9 nəfər həbs edildi
Futbol dünyasında son illərdə tez-tez rast gəldiyimiz cinayət araşdırmaları bu dəfə Fransada geniş əks-səda doğurub. APA TV-nin məlumatına görə, hüquq-mühafizə orqanlarının keçirdiyi əməliyyat çərçivəsində 9 nəfər həbs edilib.
Andre Pyer-Jinyakın "Tuluza"dan "Marsel"ə transferi ilə bağlı araşdırmalarla əlaqədar tutulanlar arasında "Marsel" klubunun prezidenti Vensan Lyabrün və klubun baş direktoru Filipp Peres də var. Bundan başqa, 2004-2009-cu illərdə "Marsel"ə rəhbərlik edən Pape Diuf, 2009-2011-ci illərdə klub prezidenti olmuş Jan-Klod Dasye də həbs edilib.
İstintaq 28 yaşlı hücumçunun 2010-cu ilin avqustunda həyata keçirilən transferi ilə əlaqədar qanunsuz komissiya məbləğinin alınıb-alınmadığını araşdırır. Hazırkı klub prezidenti Vensan Lyabrün həmin vaxt "Marsel"də müşahidə şurasının sədri, Jan-Klod Dasye isə klub prezidenti olub.
Qeyd edək ki, "Marsel" Fransa çempionatının hazırkı mövsümündə 13 turdan sonra turnir cədvəlinə liderlik edir. Transferi qalmaqala səbəb olan Andre Pyer-Jinyak bu mövsüm 10 qol vurub.
Digər cinayət işi isə danışılmış oyunlarla bağlıdır. "Kan" klubu Fransa çempionatının 2-ci liqasında çıxış etdiyi dövrdə oyun alverində ittiham olunur. Əsas şübhələr bu il mayın 13-də "Kan" - "Nim" oyununa yönəlib. "Kan" həmin oyundakı 1:1 hesablı heç-heçə nəticəsində 1-ci liqaya vəsiqə qazanıb, "Nim" isə 2-ci liqada qalmağı təmin edib.
Bu işin araşdırılması çərçivəsində "Kan" klubunun prezidenti Jan-Fransua Forten və "Nim"in rəhbəri Jan-Mark Konrad da həbs edilib.
Apa.tv
OXŞAR XƏBƏRLƏR
Naxçıvandakı Türkiyə konsulluğu “Zəfər Günü” münasibəti ilə tədbir keçirib
Prezident İlham Əliyev Şavkat Mirziyoyevi təbrik edib
Azad olunan ərazilərdə daha 36 nəfər özünüməşğulluq proqramı ilə iş sahibi oldu
Cəbrayılın Şükürbəyli kəndinə növbəti köç olub
“Sabah” futbol klubuna 5 milyon manat ayrılıb
